En Europa, Ucraína, Rusia e en todo o mundo, a xente quere a paz mentres os gobernos demandan cada vez máis armas e recursos humanos para a guerra.

A xente está a pedir o dereito á saúde, á educación, ao traballo e a un planeta habitable, pero os gobernos estannos arrastrando a unha guerra total.

A única posibilidade de evitar o peor reside no espertar do ser humano e na capacidade das persoas para organizarse.

Tomemos o futuro nas nosas propias mans: xuntámonos en Europa e en todo o mundo unha vez ao mes para un día dedicado á paz e á non violencia activa.

Apaguemos a televisión e todas as redes sociais, e apaguemos a propaganda bélica e a información filtrada e manipulada. En vez diso, participemos nunha comunicación directa coas persoas que nos rodean e organicemos actividades de paz: unha reunión, unha manifestación, un flash mob, unha bandeira da paz no balcón ou no coche, unha meditación ou unha oración segundo a nosa relixión ou ateísmo e calquera outra actividade de paz.

Cada quen o fará coas súas ideas, crenzas e consignas, pero todos xuntos apagaremos a televisión e as redes sociais.

Deste xeito confluímos no mesmo día con toda a riqueza e forza da diversidade, como xa fixemos o 2 de abril de 2023. Será un gran experimento de autoorganización internacional non centralizada.

Convidamos a todos, organizacións e cidadáns individuais, a "sincronizarse" nun calendario común ata o 2 de outubro, Día Internacional da Non Violencia, nestas datas: 7 de maio, 11 de xuño, 9 de xullo, 6 de agosto (aniversario de Hiroshima), 3 de setembro, e o 1 de outubro. Despois valoraremos xuntos como continuar.

Só nós podemos marcar a diferenza: nós, os invisibles, os sen voz. Ningunha institución ou celebridade o fará por nós. E se alguén ten unha grande influencia social, terá que aproveitalo para amplificar a voz de quen necesita con urxencia un futuro para si e para os seus fillos.

Seguiremos coa protesta non violenta (boicots, desobediencia civil, sentadas...) ata que aqueles que hoxe teñen o poder de decisión escoiten a voz da maioría da poboación que simplemente reclama paz e vida digna.

O noso futuro depende das decisións que tomemos hoxe!

Campaña Humanista "Europa pola Paz"

europeforpeace.eu